|
|
<< Kəlimət-i Məknunə kitabi
haqqinda
O
Cəlallıların
Cəlallısıdır!
Bu İzzət Cəbərutundan
qüvvət və qüdrət dili ilə keçmiş peyğəmbərlərə
nazil olanlardır. Biz onun cövhərini alıb ona öz fəzlimizlə möminlər
üçün müxtəsərlik donu geyindirdik, ta ki, onlar Allahın Əhdinə vəfa
edərək və öz həyatlarında Allahın əmanətlərini hifz edərək ruh
aləmində möminlik cövhərini əldə etsinlər.
1. EY RUH
OĞLU!
Mənim ilk nəsihətim budur: pak, lütfkar
və nurlu bir ürəyə malik ol ki, əzəli, əbədi və qədim bir səltənətə
sahib olasan.
2. EY RUH
OĞLU!
Mənim gözümdə bütün şeylərin ən
sevimlisi insafdır; Məni istəyirsənsə, ondan üz çevirmə. Ondan qafil
olma ki, Mənim yanımda əmin tanınasan. Bunun köməyi ilə sən
başqalarının gözü ilə deyil, öz gözünlə görərsən və heç kəsin biliyi
ilə deyil, öz biliyinlə tanıyarsan. Bunu ürəyində düşün, gör sən necə
olmalısan. Həqiqətən, insaf mənim sənə bir bəxşişimdir və sənə sevgi
və lütfümün əlamətidir. Onu gözünün önündə saxla.
3. EY İNSAN OĞLU!
Əslimin qədimliyində və varlığımın
əzəliyyətində idim. Öz məhəbbətimi səndə gördüm, səni yaratdım. Və
səni öz surətimdə yaratdım və öz gözəlliyimi səndə əks etdirdim.
4. EY İNSAN OĞLU!
Sənin yaradılışını sevdim, odur ki,
səni yaratdım! İndi məni sev ki, səni xatırlayım və sənin qəlbini
həyat ruhu ilə doldurum.
5. EY VARLIQ OĞLU!
Məni sev ki, Mən də səni sevim. Sən
Məni sevməsən, Mənim məhəbbətim sənə heç vəchlə çatmaz. Bunu bil, ey
bəndə!
6. EY VARLIQ OĞLU!
Mənim məhəbbətim Sənin cənnətindir.
Mənə qovuşmağın Sənin səmavi məskənindir. Oraya daxil ol, kecikmə. Uca
Mələkutda və Ali Cəbərutda sənə müəyyən olunmuş budur!
7. EY BƏŞƏR OĞLU!
Məni sevirsənsə, özündən üz çevir.
Mənim razılığımı axtarırsansa, öz istəyinə göz yum. Beləcə, sən məndə
fani ol ki, Mən də səndə əbədi yaşayım.
8. EY RUH OĞLU!
Özündən üz çevirib Mənə dönməyinçə,
sənə rahatlıq təyin olunmayıb. Çünki sənə yaraşan öz adınla deyil,
Mənim adımla şərəflənməkdir, özünə deyil, Mənə təvəkkül etməkdir.
Çünki istəyim tək Mənim, hər şeydən üstün sevilməyimdir.
9. EY VARLIQ OĞLU!
Mənim Sevgim Mənim qalamdır. Hər kim bu
qalaya daxil olsa, nicat tapar və əmin-amanlıqda olar; hər kim ondan
üz çevirsə, yolunu azar və həlak olar.
10. EY BƏYAN OĞLU!
Sən Mənim qalamsan: ona daxil ol ki,
salamat olasan. Mənim Məhəbbətim səndədir: onu özündə tanı ki, Məni
yaxınlığında tapasan!
11. EY VARLIQ OĞLU!
Sən Mənim çırağımsan və Mənim işığım
səndədir. Ondan nur al və Məndən başqasını axtarma. Çünki Mən səni
zəngin yaratmışam və bütün nemətləri səndə təkmil etmişəm.
12. EY VARLIQ OĞLU!
Səni qüvvətli əllərimlə yaratdım,
qüdrətli barmaqlarımla xəlq etdim. Nurumun cövhərini səndə əmanət
qoydum. Buna razı ol və başqa bir şey axtarma. Mənim sənətim kamil və
hökmüm nüfuzludur. Ona şəkk etmə və şübhə ilə yanaşma.
13. EY RUH OĞLU!
Səni zəngin yaratdım, nə üçün
yoxsulluğa yuvarlanırsan? Səni əziz yaratdım, nə üçün özünü
zəlil
tutursan? Səni elm cövhərindən zahir etdim,
nə üçün məndə deyil, başqalarında elm axtarırsan? Səni məhəbbət
gilindən yapdım, necə Məndən başqası ilə
məşğulsan? İndi dön özünə bax ki, məni özündə qüvvətli, qüdrətli və
qəyyum tapasan.
14. EY İNSAN
OĞLU!
Sən Mənim mülkümsən, Mənim mülküm fani
olmaz, nə üçün özünün fani olmağından qorxursan?! Sən Mənim nurumsan
və Mənim nurum sönməz, nə üçün öz sönməyindən iztirab çəkirsən? Sən
Mənim Cəlalımsan, Mənim Cəlalım heç vaxt əskilməz. Sən Mənim
köynəyimsən, Mənim köynəyim heç vaxt yırtılmaz. İndi Mənim
Məhəbbətimin kölgəsində istirahət et ki, Məni Üfüqi-Əlada tapasan.
15. EY BƏYAN OĞLU!
Başqasından üz döndərib, üzünü üzümə
çevir, çünki Mənim səltənətim əbədidir və heç vaxt sona çatmaz. Mənim
mülküm daimidir, əsla dəyişilməz. Kainatı başdanbaşa axtarsan da,
Məndən başqasını tapa bilməzsən.
16. EY NUR OĞLU!
Məndən başqasını unut və Mənim ruhumla
ünsiyyətdə ol. Bu Mənim Əmrimin cövhəridir, ona tərəf dön.
17. EY İNSAN OĞLU!
Mənimlə kifayətlən və başqa yardımçı
axtarma. Çünki Məndən başqası heç vaxt sənə kifayət etməz!
18. EY RUH OĞLU!
Sənin üçün istəmədiyimizi Bizdən
istəmə. Elə isə sənin üçün müəyyən etdiyimizə razı ol. Bu o şeydir ki,
sənə fayda verər, əgər bununla kifayətlənəsən.
19. EY ECAZKAR BƏSİRƏT OĞLU!
Sənə öz ruhumdan bir nəfəs üfürdüm ki,
Məni sevən olasan. Nə üçün Məni tərk edib başqa bir məhbub axtardın!
20. EY RUH OĞLU!
Mənim sənə haqqım böyükdür, unudula
bilməz. Mənim sənə fəzlim boldur, örtülə bilməz. Mənim məhəbbətim
səndə yuva qurub, gizlədilə bilməz. Mənim nurum səndə aşkardır, örtülə
bilməz.
21. EY BƏŞƏR OĞLU!
Sənin üçün Əbha ağacından seçilmiş
meyvələr asmışam, nə üçün üz döndərdin və əskiyinə razı oldun.
Üfüqi-Əlada sənin üçün xeyirli olanlara qayıt.
22. EY RUH OĞLU!
Mən səni ali yaratdım, sən isə özünü
alçaltdın. Yarandığın yerə yüksəl.
23. EY UCA MƏQAM OĞLU!
Mən Səni əbədiliyə çağırıram, sən isə
faniliyə yönəlirsən. Nədir səni Bizim sevdiyimizdən uzaqlaşdırıb öz
istədiyinə cəlb edən?
24. EY İNSAN OĞLU!
Öz həddini aşma, sənə layiq olmayan
şeyə iddia etmə. Qüdrət və iqtidar sahibi
olan Allah-Taalanın hüzurunda səçdə et!
25. EY RUH OĞLU!
Öz məqamınla miskin qarşısında
lovğalanma! Çünki Mən onun önündə gedirəm və sənin bədxahlığını
görüb səni həmişəlik məhrum edərəm.
26. EY VARLIQ OĞLU!
Necə oldu öz qüsurlarını unudaraq Mənim
bəndələrimin qüsurları ilə məşğul oldun? Kim belə etsə, ona Mənim
lənətim olsun.
27. EY İNSAN OĞLU!
Öz günahın olduğu halda, heç kimin
günahı barədə nəfəs belə çəkmə! Əgər bu əmrdən çıxsan, lənətlənərsən.
Mən buna şəhadət verirəm.
28. EY RUH OĞLU!
Yəqin bil,
insanları ədalətə çağırıb, özləri isə ədalətsiz davrananlar Məndən
deyillər, hətta Adımı daşısalar da!
29. EY VARLIQ OĞLU!
Özün üçün istəmədiyin şeyi başqasına da
rəva görmə. Eləməyəcəyin işi demə. Bu
Mənim sənə Əmrimdir, ona əməl et!
30. EY İNSAN OĞLU!
Mənim bəndələrimdən biri sənə üz tutub
bir şey istəsə, onu rədd etmə. Çünki onun üzü Mənim üzümdür; Məndən
utan.
31. EY VARLIQ OĞLU!
Əməllərinin hesabı çəkilməmiş, hər gün
özünə hesabat ver, çünki ölüm səni qəflətən haqlayar və əməllərin üçün
hesabat qarşısında durarsan.
32. EY UCA MƏQAM OĞLU!
Ölümü sənin üçün bir şadlıq müjdəçisi
qərar verdim, nə üçün hüznlənirsən? Nuru öz şəfəqlərini sənin üzərinə
səpmək üçün yaratdım, nə üçün ondan pərdələnirsən?
33. EY RUH OĞLU!
Nurun xoş müjdəsi ilə səni
salamlayıram, fərəhlən! Səni Müqəddəslik hüzuruna səsləyirəm, oraya
pənah apar ki, əbədi rahatlıq tapasan.
34. EY RUH OĞLU!
Ruhül-Qüds sənə vüsalın şad müjdəsini
verir, nə üçün hüznlənirsən?! Hökm ruhu
səni Öz Əmrində möhkəmləndirir, nə üçün ondan pərdələnirsən?! Onun
Liqasının nuru səni yö-nəldir, necə aza bilirsən?
35. EY İNSAN OĞLU!
Heç nəyə təəssüflənmə, hicranımızdan
başqa. Heç şeydən fərəhlənmə, Bizə yaxınlaşdırandan və yanımıza
qaytarandan başqa!
36. EY İNSAN OĞLU!
Öz könlünün süruru ilə fərəhlən ki,
Mənim liqama layiq olasan və Mənim Camalımı əks etdirəsən.
37. EY İNSAN OĞLU!
Özünü Mənim gözəl libasımdan məhrum
etmə! Mənim ecazkar bulağımdan nəsibini itirmə! Ta ki, Mənim Zatımın
Əbədiyyəti boyunca səni susuzluq tutmasın.
38. EY VARLIQ OĞLU!
Qanunlarıma Mənə məhəbbətin xatirinə
əməl et. Razılığımı axtarırsansa, öz nəfsinin istəklərindən imtina et.
39. EY İNSAN OĞLU!
Camalımı sevirsənsə Əmrlərimə, etinasız
yanaşma! Razılığıma nail olmaq istəyirsənsə, nəsihətlərimi unutma!
40. EY İNSAN OĞLU!
Sonsuz Kainatda dövrə vursan, Göylərin
fəzasında dolaşsan belə, Əmrimizə baş əyib önümüzdə təzim etməyincə,
heç vaxt rahatlıq tapa bilməyəcəksən.
41. EY İNSAN OĞLU!
Əmrimi yüksəlt ki, Əzəmətimin sirlərini
sənə açım və əbədiyyət nuru ilə səni işıqlandırım.
42. EY İNSAN OĞLU!
Mənim qarşımda baş əy ki, rəhmətimlə
sənə aşkar olum. Mənim Əmrimin qələbəsinə qalx ki, hələ bu dünyada
ikən qalib olasan.
43. EY VARLIQ OĞLU!
Məni Torpağımda zikr et ki, səni öz
Göylərimdə xatırlayım. Bununla Mənim gözlərim və səninkilər təskinlik
tapsın.
44. EY ƏRŞ OĞLU!
Sənin eşitmən mənim eşitməmdir, elə isə
onunla eşit. Sənin görmən mənim görməmdir, elə isə onunla gör ki, öz
sirli cövhərində Mənim Ali Müqəddəsliyimi təsdiq edəsən. Mən isə
Özlüyümdə sənin uca Məqamına şəhadət verim.
45. EY VARLIQ OĞLU!
Mənim razılığımla kifəyətlənərək və
sənin üçün müəyyən etdiyimizə şükr edərək yolumda şəhidlik axtar ki,
Əzəmət Çadırının altında və İzzət Sərapərdəsinin arxasında mənimlə
dinçələsən.
46. EY İNSAN OĞLU!
Öz əməlinə fikir ver və düşün: öz
yatağında ölmək istəyirsən, yoxsa Mənim yolumda torpaq üzərində qan
tökməklə şəhid olaraq ən Uca Cənnətdə Əmrimin Məşriqi və Nurumun
Məzhəri olmaq istəyirsən? Özün insafla düşün, ey bəndəm!
47. EY İNSAN OĞLU!
Camalıma and olsun! Saçlarının öz
qanına boyanması Mənim nəzərimdə Kainatın yaranmasından və iki
dünyanın ziyasından daha böyükdür. Buna çalış, ey bəndə!
48. EY İNSAN OĞLU!
Hər şeyin bir əlaməti var, məhəbbətin
əlaməti də mənim qəzama səbr etmək və mənim bəlalarıma dözməkdir.
49. EY İNSAN OĞLU!
Günahkar bağışlanmasını necə istəyirsə
və təqsirkar mərhəməti necə umursa, həqiqi aşiq də bəlaları o cür
arzulayır.
50. EY İNSAN OĞLU!
Əgər bəlalara Mənim yolumda düşməsən,
onda necə Mənim Rizayətimlə razı
olanların yolu ilə gedə bilərsən? Əgər məşəqqətə
Mənim hüzuruma yetişmək şövqü ilə düşməsən,
Mənim Camalıma məhəbbətin nuru ilə
necə işıqlana bilərsən?
51. EY İNSAN OĞLU!
Mənim bəlam mənim inayətimdir - zahirdə
oddur, cəzadır, batində isə Nurdur və
mərhəmətdir. Onu qarşıla ki, əzəli bir nur və əbədi bir ruh olasan.
Bu Mənim Əmrimdir, ona əməl et!
52. EY BƏŞƏR OĞLU!
Sənə nemət qismət olarsa, fərəhlənmə
və zillətə düçar olsan, kədərlənmə, bunların hər ikisi bir anda keçib
gedər və yox olar.
53. EY VARLIQ OĞLU!
Əgər yoxsulluğa düşsən qüssələnmə, vaxt
olar, varlılıq Sultanı sənin görüşünə gələr. Zillətdən qorxma, bir gün
gələr izzət sənə nəsib olar.
54. EY VARLIQ OĞLU!
Əgər sənin
qəlbin bu əbədi və daimi dövlətə, bu əzəli və qədimi həyata yönəlibsə,
bu fani və ani dövləti tərk et.
55. EY VARLIQ OĞLU!
Özünü bu fani dünya ilə məşğul etmə,
çünki Biz qızılı atəşlə, bəndələri isə qızılla sınayırıq.
56. EY İNSAN OĞLU!
Sən qızılı arzulayırsan, Mən isə sənin
ondan azad olmağını istəyirəm. Sən öz varlılığını ona malik olmağında
görürsən, Mən isə sənin varlılığını ondan təmiz olmağında görürəm.
Həyatıma and olsun! Bu mənim elmimdir, o isə sənin xəyalındır. Necə
ola bilər ki, Mənim yolum səninki ilə uyğun gəlsin?
57. EY İNSAN OĞLU!
Mənim malımı Mənim yoxsullarıma
ver ki, Mənim göydəki solmayan cəlalımın dəfinələrindən və dağılmayan
şanımın xəzinələrindən bəhrələnəsən. Lakin həyatıma and olsun! Mənim
gözümlə baxsan, ruhu fəda etmək daha gözəldir.
58. EY BƏŞƏR OĞLU!
Varlıq heykəli Mənim taxtımdır .
Mənim onun üstündə əyləşib orada bərqərar olmağım üçün onu hər şeydən
təmizlə.
59. EY VARLIQ OĞLU!
Sənin ürəyin mənim mənzilimdir — Mənim
nazil olmağım üçün onu təmizlə. Ruhun mənim Vəhyimin məkanıdır, mənim
Zühurum üçün pak et.
60. EY İNSAN OĞLU!
Əlini Mənim qoynuma sal ki, parlayaraq və işıq saçaraq
sənin üzərində ucalım.
61. EY İNSAN OĞLU!
Göylərimə yüksəl ki, vüsalımın
sevincinə qovuşasan və tükənməz cəlal piyaləsindən misilsiz şəffaf
şərab içəsən!
62. EY İNSAN OĞLU!
Günlərinin çoxu keçdi. Sən isə nəfsinin
istədiyi xəyal və güman ilə məşğul olmusan. Nə vaxtadək öz qəflət
yatağında yatacaqsan? Başını qəflətdən qaldır, Günəş üfüqə çatıbdır,
bəlkə Camalın nuru sənin üzərinə saçıla.
63. EY İNSAN OĞLU!
Tur dağının üfüqundən sənə nur saçdı və
könlünün Sinasına ziya ruhu üfürüldü. Elə
isə özünü bədgümanlıq pərdələrindən xilas et və Mənim dərgahıma daxil
ol ki, əbədi həyata qabil olasan və mənim liqama layiq olasan, ta ki,
sənə nə ölüm nəsib olsun, nə də əzab-əziyyət.
64. EY İNSAN OĞLU!
Mənim Əzəliyyətim Mənim
yaratdığımdır, onu sənin üçün yaratdım — onu öz heykəlin üçün
libas et. Mənim Təkliyim mənim quruluşumdur, onu sənin üçün yaratdım,
özünü ona bürü ki, sən əbədi olaraq Mənim qəyyumluq
məşriqim
olarsan.
65. EY İNSAN OĞLU!
Mənim Əzəmətim Mənim sənə hədiyyəmdir,
Mənim Kibriyam sənə olan Rəhmətimdir. Mənə layiq olanı heç kim nə dərk
edə, nə də saya bilər. Həqiqətən, Mən onu Öz bəndələrimə məhəbbət və
lütfümün və yaratdıqlarıma mərhəmətimin işarəsi olaraq Mənim əmr
xəzinələrimdə və sirli dəfinələrimdə gizlətdim.
66. EY İLAHİ, GÖRÜNMƏZ CÖVHƏRİN
UŞAQLARI!
Siz özünüzü Mənim məhəbbətimdən məhrum
edirsiniz və qəlblər Mən xatırlananda iztiraba düşürlər, çünki ağıllar
Məni dərk edə bilməz və Mən qəlblərə sığışmaram.
67. EY CAMAL OĞLU!
Ruhuma və inayətimə, rəhmətimə və
Camalıma and olsun! Qüdrət dili ilə sənə nazil etdiyim və Qüvvət
qələmi ilə yazdıqlarım Mənim şənimə və
ləhnimə
görə deyil, sənin dərkinə və istedadına görədir.
68. EY İNSAN ÖVLADLARI!
Məgər siz bilmirsinizmi, Biz sizi nə
üçün bir torpaqdan yaratdıq? Onun üçün ki, heç kəs heç kəsin
qarşısında qürrələnməsin. Hər an, öz ürəyinizdə nədən yarandığınızı
düşünün. Bir halda ki, Biz sizi bir ünsürdən yaratmışıq, siz bir ruh
kimi olmalısınız, bir ayaqla yeriməli, bir ağızla yeməli və bir yerdə
sakin olmalısınız. Ta ki, sizin zatınızdan hərəkətlərinizlə,
əməllərinizlə tovhid nişanələri və təcrid çövhərləri aşkar olsun. Sizə
nəsihətim budur, ey nur əhli! Bu nəsihəti qəbul edin ki, yüksək İzzət
ağacından müqəddəs meyvələr dərəsiniz.
69. EY RUH OĞULLARI!
Siz Mənim xəzinələrimsiniz, çünki sizdə
sirlərimin incilərini və elmimin cəvahiratını gizlətmişəm. Onu Mənim
bəndələrim arasındakı yadlardan və şər adamlardan qoruyun.
70. EY ÖZ SƏLTƏNƏTİNDƏ NƏFSİNİN
ZATI İLƏ QALANIN OĞLU!
Bil ki, Mən səni müqəddəslik
ətirlərinin rayihəsi ilə bürüdüm, Öz sözlərimi sənə tamamilə açdım və
Öz nemətimi səninlə tamamladım və Özümə razı olduğumu sənə də razı
oldum. Onda Mənim rizayətimlə kifayətlən və Mənə şükr et!
71. EY İNSAN OĞLU!
Sənə bütün bu açdıqlarımızı nur
mürəkkəbi ilə öz ruhunun lövhəsi üzərinə yaz. Əgər buna qadir olmasan,
qəlbinin cövhərindən mürəkkəb düzəlt. Əgər bunu da bacarmasan, onda
Mənim yolumda tökülən al mürəkkəblə yaz. Həqaqətən, bu Mənə hamısından
şirindir. Qoy onun nuru əbədi olaraq qalsın.
Kəlimət-i Məknunə. II Hissə (Fars dilindən) >>
|
|
