Bəhaullah və Yeni Era - Con Ebenezer Esslemont

Həzrət Bəhaullahın Təlimi ilə ilk dəfə 1914-cü ilin dekabrında Həzrət Əbdülbəha ilə görüşmüş dostlarımla etdiyim söhbətlərdən və bir neçə kitabçanı oxuyandan sonra tanış oldum.

Bu Təlimin fikir dərinliyi, gücü və gözəlliyi məni heyrətə gətirdi. Hiss etdim ki, bu din müasir dünyanın tələbatına mənə məlum olan dinlərdən daha artıq və tam cavab verir. Sonrakı mütaliələr mənim bu fikrimi daha da dərinləşdirdi və inamımı təsdiq etdi.

Bu Təlimlə daha ətraflı tanış olmaq arzusu ilə ədəbiyyat axtarışı məni böyük çətinliklərlə rastlaşdırdı, onları oxuyub öyrəndikdən sonra isə başqaları üçün həmin yolu asanlaşdırmaqdan ötrü bu Təlimin mahiyyətini kiçik bir kitabda şərh etmək qərarına gəldim.

Müharibədən sonra Fələstinlə əlaqələr bərpa olunduğu zaman, o vaxt hələ işlənməmiş halda olan kitabın ilk doqquz fəslini əlavə etməklə Həzrət Əbdülbəhaya məktub yazdım. Bir müddət keçdikdən sonra olduqca iltifatlı və xeyirxah rəy, həmçinin Hayfaya gəlmək üçün səmimi dəvət və bütün əlyazmalarımı da gətirmək xahişi aldım. Mən bu dəvəti qəbul etdim və iki ay yarım müddətində, 1919 və 1920-ci illərin qışında Həzrət Əbdülbəhanın qonağı olmaq şərəfinə nail oldum.

Orada olduğum zaman Həzrət Əbdülbəha bir neçə dəfə kitab barəsində mənimlə söhbət etdi. O, mənə xeyli dəyərli göstərişlər verərək təklif etdi ki, bütün əlyazmaları işləyib hazırladıqdan sonra Onun oxuyub lazım bildiyi yerlərdə düzəlişlər edə bilməsi üçün onları fars dilinə tərcümə etdirim. Bu təklifə əməl olundu. Həzrət Əbdülbəha Özünün məşğulluğuna baxmayaraq, bizi tərk edənə qədər kitabın üç fəsil yarımını: birinci, ikinci, beşinci fəsilləri və üçüncü fəslin yarısını redaktə etməyə vaxt tapdı.

Dərin təəssüf hissi keçirirəm ki, Həzrət Əbdülbəha bütün əlyazmalarımı tam redaktə edə bilmədi və bununla da mənim işimə böyük dəyər bəxş etməyə müvəffəq olmadı. Buna baxmayaraq, İngiltərə Bəhailərinin Milli Ruhani Məhfilinin çap komitəsi tərəfindən əsərin bütün əlyazmaları diqqətlə oxunmuş və bəyənilmişdir.

Mən miss E. Rozenberqə, xanım Koulsa, Mirzə Lütfulla Həkimə, cənab Roy Vilhelmə, cənab Mauntfort Millsə və digər dostlarıma hazırlıq işlərində mənə göstərdikləri çox dəyərli köməyə görə təşəkkür edirəm.

Bu kitabda qəbul olunmuş ərəb və fars adlarının və sözlərinin transliterasiya sistemi Həzrət Şövqi Əfəndinin bütün bəhai dünyasına etdiyi tövsiyəyə uyğundur.

Feyerford, Aberdin yaxınlığında Kul
C. E. Esslemont