Ý Kitabın əvvəlinə   

---

XIV FƏSİL. BƏHAULLAHIN VƏ ƏBDÜLBƏHANIN PEYĞƏMBƏRLİKLƏRİ

“Və əgər sən ürəyində desən ki: "Rəbbin demədiyi sözü biz necə biləcəyik?" Əgər Peyğəmbər Rəbbin adından deyirsə, lakin bu söz çin olmazsa və yerinə yetməzsə, onda Rəbb bu sözü söyləməyib, Peyğəmbər öz cəsarəti üzündən bunu söyləyib – ondan qorxmayın"

İkinci qanun 18:21-22

ALLAH KƏLAMININ YARADICI QÜDRƏTİ

III NAPOLEON

ALMANİYA

İRAN

TÜRKİYƏ

AMERİKA

BÖYÜK MÜHARİBƏ

MÜHARİBƏDƏN SONRAKI İCTİMAİ FƏLAKƏTLƏR

İLAHİ SƏLTƏNƏTİN BAŞLANMASI

ƏKKA VƏ HAYFA

 

---

ALLAH KƏLAMININ YARADICI QÜDRƏTİ

Allah və yalnız Allah, istədiyi hər bir şeyi etməyə qadirdir və Allah Zühurunun ən böyük sübutu dəyişdirməyə və yeniləşdirməyə və adamlar tərəfindən göstərilən hər cür müqavimət üzərində qələbə çalmağa qadir olan Onun kəlamının yaradıcı qüdrətidir. Peyğəmbərlərin kəlamı vasitəsilə Allah Öz İradəsini bəyan edir və bu kəlamın dərhal və ya müəyyən vaxtdan sonra yerinə yetməsi Peyğəmbərin haqlılığına və Onun İlhamının həqiqiliyinə ən bariz sübutdur.

"Yağış və qar göydən enir və oraya qayıtmır, lakin torpağı içirdir və onu məhsul verməyə və yetişdirməyə qadir edir ki, onu səpən adama toxum versin və yeyən kəsə çörək versin: dilimdən çıxan Mənim sözüm də elədir — o, əbəs yerə Mənə qayıtmır, lakin Mənə lazım olanı yerinə yetirir və Mən onu nə üçün göndərmişəmsə, onu başa çatdırır" (Библия. Книга Пророка Исайи. 55:10—17).

"Yəhya isə zindanda Məsihin işlərini eşidərək şagirdlərindən ikisini göndərdi ki, Ona desinlər: "Gələcək olan Sənmisən, yoxsa başqasını gözləyək?" İsa da cavabında onlara dedi: "Gedin, eşitdiyiniz və gördüyünüz şeyləri Yəhyaya bildirin: Korlar görür, axsaqlar yeriyir, cüzamlılar təmizlənir, karlar eşidir, ölülər dirilir və yoxsullar firavan yaşayır. Və Mənim barəmdə aldanıb yolundan azmayanlar nə bəxtiyardır" (İncil. Matta, 11:2-6).

Baxaq görək, Həzrət Bəhaullahın kəlamlarının Allah kəlamlarına xas olan eyni yaradıcı qüvvəyə malik olmasını hansı dəlillər sübut edir.

Həzrət Bəhaullah dünya hökmdarlarına ümumbəşəri sülh yaratmağı tövsiyə edir; lakin onların yeritdiyi müharibə siyasəti 1869-1870-ci illərdə bir çox qədim sülalələrin devrilməsinə gətirib çıxartdı və davam etdirilən hər bir müharibə getdikcə daha az fayda gətirməyə başladı və nəhayət, 1914-1918-ci illərin Avropa müharibəsinin tarixən ibrətamiz faktı göstərdi ki, müharibə həm qalib gələn, həm də məğlub olan üçün eyni dərəcədə dağıdıcıdır.[1]

Həzrət Bəhaullah həmçinin hökmdarları hakimiyyəti altında olanların etibarlı himayəçisi kimi hərəkət etməyə və öz siyasi hakimiyyətlərindən xalqın əsl ümumi rifahını yüksəltmək vasitəsi kimi istifadə etməyə çağırırdı. Bu tövsiyənin ardınca ictimai qanunvericilikdə baş verən tərəqqi misilsiz oldu.

Həzrət Bəhaullah həmçinin varlılıq yoxsulluğun ifrat dərəcələrinin aradan qaldırılmasını buyurmuşdur və o vaxtdan bəri yaşayış minimumunun sabitləşməsi, gəlir və miras vergiləri vasitəsilə differensial vergi sisteminin tətbiq olunması məsələləri qanunvericilik orqanlarının başlıca qayğısına çevrilmişdir. O həmçinin həm quldarlığın, həm də iqtisadi əsarətə məhkumluğun ləğv edilməsini məsləhət görürdü və o vaxtdan başlayaraq dünyanın hər yerində iqtisadi azadlıq uqrunda mübarizənin uğurlu gedişinə təkan verildi.

Həzrət Bəhaullah qadın və kişilərin eyni məsuliyyət, eyni hüquq və imtiyazlarla ifadə olunan bərabərliyini elan etdi və bu prinsip bəyan olunduğu vaxtdan bəri, əsrlərlə qadınları əsarət buxovları altında saxlayan zəncirlər qırılmış və qadınlar tez bir zamanda kişilərlə bərabər hüquqlu şəxslər kimi cəmiyyətdə onlara məxsus olan mövqeyi tutmağa başlamışlar.

O bütün millətlərin əsasının bir olduğunu elan etdi: və o vaxtdan keçən dövr ərzində dünyanın hər yerində səmimi insanların ümumi məqsədlərə yetmək naminə dözümlülük, qarşılıqlı anlaşma və əməkdaşlıq sahəsində yeni nailiyyətlər qazanılmasında göstərdikləri qətiyyətli səylər buna bariz nümunədir. Təriqətçilik hər yerdə öz əhəmiyyətini itirir və onun tarixi mövqeyi getdikçə daha çox sarsılmağa başlayır.

Bu və ya digər dinin üstünlüyü və müstəsnalığı barəsindəki müddəalar da qapalı millətçiliyi gələcəkdə mövcud olmaq qabiliyyətindən məhrum edən elə həmin qüvvələr tərəfindən darmadağın edilir.

O, icbari və ümumi təhsili vacib buyurur və hamıya həqiqəti müstəqil axtarmağı məsləhət görərək, bunu mənəvi həyatın əsas keyfiyyəti sayır. Bu yeni hərəkətvericci amil müasir sivilizasiyanı başdan-ayaqa bürümüşdür. Uşaqların icbari təhsili və eləcə də yaşlı nəslin savadlanması üçün əlverişli şəraitin yaradılması hər bir dövlətin siyasətində birinci dərəcəli əhəmiyyət kəsb edən məsələyə çevrilmişdir.

Öz vətəndaşları arasında düşüncə və vicdan azadlığını bilərəkdən məhdudlaşdırmağa çalışan dövlətlər bu siyasətləri ilə öz ölkələri daxilində inqilabi hərəkat, eləcə də onun sərhədlərindən kənarda inamsızlıq və həyəcanlar yaratmışlar.

Həzrət Bəhaullah köməkçi beynəlxalq dilin qəbul edilməsini buyurmuşdur. Və bunun ardınca doktor Zamenqof və başqaları sanki bu çağırışa cavab verərək öz həyatlarını və dühalarını bu böyük işə həsr etmişlər.

Ən əsası odur ki, Həzrət Bəhaullah bəşəriyyəti yeni ruhla ilhamlandıraraq, insanların ürəklərində və düşüncələrində yeni arzular və cəmiyyət üçün yeni ideallar oyatmışdır. Bəşər tarixinin yarandığı gündən bəri Bəhai Erasının (1844-cü il) əvvəlində baş verən hadisədən daha dramatik və həyacanlandırıcı hadisə olmamışdır.

İllər ötdükçə köhnəlmiş ideyalar, adətlər və münasibətlər sayəsində hələ də mövcud olan köhnə qaydalar elə üzülüb taqətdən düşür ki, bəşəriyyətin indi ən kəskin böhran dövrünü yaşadığı hal-hazırda hər bir düşüncəli adama aydın olur. Bir tərəfdən Həzrət Bəhaullahın Təliminin nurunun şəfəqləri insan təkamülünün əsl yolunu işıqlandırdığı üçün biz yaradıcı qüvvələrin yüksəlişini müşahidə edir, digər tərəfdən isə, bu Təlimin nuruna etinasızlıq göstərən və ya onun daxil olmasına maneələr yaradan bütün sahələrdə fəlakət və dağıntıların şahidi oluruq.

Bu və saysız-hesabsız digər dəlillər, nə qədər təsirli olsa da, onlar Həzrət Bəhaullahın mənəvi əzəməti haqqında tam təsəvvür yaratmır. Onun yer üzündəki həyatı və Onun ilhamverici sözlərinin sarsılmaz qüdrəti Allah İradəsinin yeganə, əsl meyarıdır.

Həzrət Bəhaullahın söylədiklərini və onların yerinə yetməsinin daha ətraflı öyrənilməsi buna əsaslı və inandırıcı sübutlar verir. Aşağıda biz deyilmiş bu xəbərlərdən bəzi misallar gətirəcəyik ki, onların həqiqiliyi şübhə oyatmır. Onlar hələ yerinə yetməmişdən əvvəl nəşr edilmişdir. Bu xəbərlərin əksəriyyəti Onun dövlət başçılarına göndərdiyi məktublarda da vardır.

Bu məktublar "Surətül-heykəl" kitabında toplanaraq, ötən yüzilliyin sonlarında ilk dəfə olaraq Bombeydə çap olunmuş və bu vaxtadək dəfələrlə yenidən nəşr edilmişdir. Biz həmçinin Həzrət Əbdülbəhanın söylədiyi, diqqəti xüsusilə cəlb edən xəbərlərdən də müəyyən misallar gətirəcəyik.

III NAPOLEON

Həzrət Bəhaullah 1869-cu ildə III Napoleona göndərdiyi məktubda onu müharibə aparmaq hərisliyinə görə və Həzrət Bəhaullahın əvvəlki məktubuna etinasızlıq göstərdiyinə görə məzəmmət edir. Məktub aşağıdakı ciddi xəbərdarlıqlardan ibarətdir:

"Sənin əməllərin sənin ölkəni hərcmərcliyə çevirəcək və sənin əməllərinin əvəzi kimi hakimiyyət sənin əlindən çıxacaqdır və sən ağır itkilərə düçar olacaqsan. Əgər sən bu Təlimin müdafiəsinə qalxmasan və bu yolda Allah Ruhunun arxasınca ketməsən, sənin ölkəndəki bütün millətləri həyəcanlar bürüyəcəkdir.

Doğrudanmı sənin təmtərağın səni təkəbbürlü edib? Həyatıma and olsun! Bu çox davam etməz, əksinə, əgər sən möhkəm ipdən yapışmasan, o keçib gedər. Biz sənin ardınca gələn həqarəti görürük, lakin sən buna fikir vermirsən. Əgər sən Onun Şərəf Taxtından səslənən çağırışı eşitsən, malik olduğun hər şeyi atmalı və Ona ucadan cavab verməlisən: Mən buradayam, ey göylərdə və yerdə nə varsa hamısının Rəbbi olan Allah!" (Bəhaullahıi bəyanı, s.34)

Demək artıqdır ki, o zaman öz şöhrətinin zirvəsində olan III Napoleon bu xəbərdarlığa heç bir əhəmiyyət vermir. Qoşunlarının Berlini asanlıqla ala biləcəyinə möhkəm əmin olduğu üçün sonrakı il o Prussiya ilə müharibəyə başlayır. Lakin Həzrət Bəhaullahın əvvəlcədən xəbər verdiyi fəlakət onu yaxalayır. O, Saarbruk, Vissenburq, Mets döyüşlərində məğlubiyyətə uğrayır və Sedan ətrafında isə tamamilə darmadağın edilir. Sonra o, əsir alınaraq, Prussiyaya gətirilir və iki ildən sonra isə İngiltərədə acınacağlı halda ömrünü başa vurur.

ALMANİYA

Sonra Həzrət Bəhaullah III Napoleona qalib gələnlərə də buna bənzər ciddi xəbərdarlıq göndərdi, onlar isə bunu qulağardına vurduqlarına görə, xəbərdarlıqlar dəhşətli şəkildə gerçəkləşdi. Ədirnədə yazmağa başladığı və Əkka dustaqlığının ilk illərində qurtardığı "Kitabi-Əqdəs"də Həzrət Bəhaullah Almaniya İmperatoruna belə müraciət edir:

"Ey Berlinin kralı!.. Şöhrətinə görə səndən artıq olan və məqamına görə səndən yüksək olan o kəsi xatırla.[2] O haradadır və onun ölkəsi haradadır? Özünü gözlə və qəflət yuxusunda yatanlardan olma. Zülmkarların təqiblərindən çəkdiyimiz məşəqqətlər haqqında Biz ona xəbər verəndə, o Allahın müraciətinə arxa çevirdi. Buna görə də yerlə yeksan olanadək onu hər tərəfdən həqarətlər bürüdü.

Ey kral! Onun barəsində və sənin kimi şəhərləri alan və insanlar üzərində hökmranlıq edənlər haqqında ciddi fikirləş. Mərhəmət Sahibi onları saraylardan qəbirə endirib. Ehtiyatlı ol və ağıllılar cərkəsinə qoşul!

Ey Reyn çayının sahilləri! Biz sizə baxdıq və intiqam qılınclarının sizə qarşı çevrildiyi vaxt sizi qan içində boğulan gördük; və siz bir dəfə də cəzalanacaqsınız. Bu gün hamı onun əzəmətini görsə də, artıq Biz Berlinin ah-naləsini görürük." (Bəhaullahın bəyanı, s.51)

Almaniyanın 1914-1918-ci illərdəki Böyük Müharibədə qələbələr qazandığı dövrdə və xüsusilə də 1918-ci ilin yazında almanların sonuncu böyük hücumu zamanı hamıya məlum olan Peyğəmbərcəsinə söylənmiş bu xəbər bəhai hərəkatının İrandakı rəqibləri tərəfindən Həzrət Bəhaullahı nüfuzdan salmaq məqsədilə geniş istifadə edilirdi, lakin yenilməz almanların sürətli qələbələri qəfildən onlar üçün dəhşətli məhvedici fəlakətə çevrilən zaman bəhailərin düşmənlərinin bütün cəhdləri də onların özlərinə qarşı çevrildi və onların Həzrət Bəhaullahın söylədiyi xəbərlərə gətirdikləri məşhurluq Onun Şöhrətinin daha da ucalmasına səbəb oldu.

İRAN

Müstəbid Nasirəddin şah hakimiyyəti öz qüdrətinin zirvəsində
olduğu bir zamanda yazdığı "Kitabi-Əqdəs" əsərində Həzrət Bəhaullah İranın paytaxtı, Özünün doğma şəhəri Tehran haqqında belə buyurur:

"Ey Ta torpağı (Tehran), qətiyyən kədərlənmə. Allah səni bütün bəşəriyyətin şadyanalıq yeri olmaq üçün seçib. Əgər Allah istəsə, öz Taxtının xeyir-duasını canavarların didərgin saldığı Allah quzularını toplayan və ədalətlə hökmranlıq edən o Kəsə verər. Həqiqətən bu hökmdar Bəhanın ardıcılları ilə gülər üzlə və iltifatla davranacaqdır. Həqiqətən, o – Allah qarşısında yaradılmışların incisidir: qoy Allahın şəfəqi və Onun Zühur Səltənətində olanların şöləsi həmişə onun üzərində olsun. Ona sevin ki, Allah səni Onun Nurunun çeşməsi seçib, çünki Onun Şərəfinin Məzhəri səndə əmələ gəlmişdir. Ona sevin ki, nemətlər çırağının parıldayan, göyləri və yer üzünü işıqlandıran adı sənə qismət olub. Tezliklə hər şey dəyişiləcək və hakimiyyət xalqın əlinə keçəcəkdir. Həqiqətən, sənin Allahın hər şeyi biləndir və hər şeyi dərk edəndir. Öz Rəbbinin mərhəmətinə əmin ol. Onun mehriban nəzərləri daim sənə yönələcəkdir. Tezliklə, iqtişaşlardan sonra, səndə sülh və əmin-amanlıq günləri bərqərar olacaqdır. "Ecazkar Kitabda" qismətinə belə yazılmışdır" (Bəhaullahın Yazılarının antologiyası, s.110-111)

Həzrət Bəhaullahın əvvəlcədən xəbər verdiyi kimi, İran iqtişaşlardan çıxmağa başladığı bir vaxtda, orada konstitutsiyalı idarəetmə yaranır və bəzi əlamətlər onun parlaq eraya qədəm qoyacağı vaxtın yaxınlaşdığını göstərir.

TÜRKİYƏ

Həzrət Bəhaullah 1868-ci ildə Türkiyədə sürgündə olarkən, Türkiyə sultanı Əbdüləzizə və onun Baş naziri Əli Paşaya Özünün ən ciddi və kəskin xəbərdarlıqlarını göndərir. O, Əkka həbsxanasından Sultana belə yazırdı:

"Ey özünü bütün adamlardan ən möhtəşəmi sayan... Sənin adının unudulacağı və sənin çox şey itirəcəyin gün uzaqda deyil. Səncə dünyanı Canlandıran və millətləri Barışdıran bu şəxs cinayətkar və qiyamçıdırmı? Sənin qəzəbinə, nifrətinə və təqibinə düçar olan bu qadınlar, uşaqlar və əzab çəkən körpələr hansı cinayətləri törədiblər?

Sən o adamları təqib edirsən ki, onlar sənin ölkəndə heç bir düşmənçiliyi qızışdırmayıb və heç kimi hökumətə qarşı qiyama təhrik etməyiblər. Xeyr, əksinə, onlar kecə-gündüz Allaha dua edərək özlərini dinc aparmışlar. Siz onların əmlaklarını tamamilə əllərindən almısınız və onları hər şeydən məhrum etmisiniz.

Allaha and olsun! Bir ovuc torpaq sizin malikanələrinizdən, sultanlığınızdan, şöhrətinizdən və hakimiyyətinizdən daha yüksəkdir və əgər Allahın İradəsi olarsa, O, sizi qum kimi səhraya səpələyər. Tezliklə Allahın qəzəbi sizi tutacaq, aranızda iqtişaş başlayacaq və sizin hakimiyyətiniz dağılacaqdır. Onda siz inildəyib ağlayacaqsınız... Sayıq ol, çünki Allahın qəzəbi hazırlanır və hökm Qələminin nə yazdığını tezliklə sən görəcəksən" ("Qərbin ulduzu", c.11, s.3).

O, Əli-Paşaya belə yazırdı:

"Ey Rəis (Başçı)! Sənin etdiyin əməllər, Uca Cənnətdə Allahın Rəsulu Məhəmməd-əleyhissalamı inildəmək məcburiyyətində qoymuşdur. Dünya şöhrəti səni elə təkəbbürlü edib ki, sən Səma Güruhlarını işıqlandıran o Şəxsdən üz çevirmisən. Tezliklə sən nə itirdiyini aydın başa düşəcəksən. Mən Qadir Allahın Əzəmət Sübhü məqamından Allahın sevimlilərinin gözlərini işıqlandıran təlimlə sənin yanına gəldiyim zaman, mənə pislik etmək üçün sən İran hökmdarı ilə birləşdin...

Sən elə fikirləşirdin ki, Allahın dünyada yandırdığı atəşi söndürə biləcəksən? Xeyr! Allahın əsl Mahiyyətinə and olsun, kaş ki, sən bilənlərdən olaydın. Əksinə, sən öz hərəkətinlə bu atəşin alovunu daha da gücləndirdin. Tezliklə o bütün dünyanı və onun sakinlərini bürüyəcəkdir... Tezliklə Sirlər torpağında (yəni Ədirnədə) və digər şəhərlərdə hər şey dəyişəcək və onlar hakimlərin əllərindən çıxacaqdır: iqtişaşlar başlayacaq, ah-nalə göyə uçalacaq və işlər pozulacaqdır və bütün bunlar təqibçilər ordusu tərəfindən bu əsirlərə (Bəhaullaha və Onu müşayiət edənlərə) verilən əzablara görə olacaqdır.

Qaydalar dəyişəcək və vəziyyət elə ağır dərəcəyə çatacaqdır ki, səhrada qumlar inildəyəcək, dağlarda ağaclar ağlaşacaqdır və bütün məxluqların qanı axacaq və millət ən bəyük fəlakətlərə düçar olacaqdır...

Qadir Allahın İradəsi belədir və nə göy və yer orduları Onun hökmünə qarşı dura bilər, nə də dünyanın şahları və hökmdarları Onun İradəsinə müqavimət göstərə bilərlər. Fəlakətlər bu Çırağın yanacağıdır və əgər siz başa düşənlərdənsinizsə, bunların sayəsində Çırağın şəfəqləri artır.

Zülümkar tərəfindən hər hansı bir düşmənçilik, həqiqətən, bu Təlimin xəbərçisinə çevrilir və onun sayəsində Allahın İşi və Onun Təzahürü bütün dünya adamları arasında tanınır" (Bəhaullah. Rəisə məktub)

Eləcə də O "Kitab-i-Əqdəs" də yazır:

"Ey iki dənizin sahilində yerləşən şəhər![3] Ədalətsizlik taxtı sənin qoynunda qurulub və səndə nifrət odu o qədər alovlanıb ki, səma sakinləri və Ən Uca Taxtın ətrafında olan kəslər sənin halına zar-zar ağlayırlar. Biz görürük ki, sənin qoynunda cahillər ağıllılar üzərində rəhbərlik edirlər və zülmət işıq üzərində qələbə çalır: həqiqətən, sən aşkar təkəbbür içindəsən.

Doğrudanmı sənin zahiri dəbdəbən səni lovğa edibdir? Məxluqların Rəbbinə and olsun, o tezliklə yox olacaqdır. Və sənin qızların, dul qalmış övrətlərin və səndə məskunlaşmış bütün tayfalar inildəməyə başlayacağlar. Hər şeyi bilən və hər şeyi görən səni belə xəbərdar edir" (Bəhaullah, Kitab-i-Əqdəs)

Həzrət Bəhaullahın çəkindirmək məqsədilə etdiyi xəbərdarlıqların nəşrindən sonra vaxtı ilə böyük olan bu imperiyanın başına gələn fasiləsiz fəlakətlər Peyğəmbərcəsinə söylənmiş xəbərlərin yerinə yetdiyinə ən parlaq sübutdur.

AMERİKA

Həzrət Bəhaullah 1873-cü ildə Əkkada yazdığı "Kitabi-Əqdəs"də Amerikaya belə müraciət edir:

"Ey Amerikanın hakimləri, ölkənin prezidentləri və qubernatorları... Sübhçağı Yüksəkliyindən gələn sədanı eşidin: "Məndən başqa Danışan, Bilən Allah yoxdur. İncidilmiş məzluma ədalət əli ilə sığal verin və zülmkarı sizin hökmverən və Müdrik Allahınızın əmr qamçısı ilə cəzalandırın"

Həzrət Əbdülbəha Özünün Amerikadakı və digər ölkələrdəki çıxışlarında dəfələrlə əmin olduğunu, ümid bəslədiyini bildirmişdi ki, beynəlxalq sülhün bayrağı ilk dəfə Amerikada ucaldılacaqdır. 1912-ci il noyabrın 5-də Ohayo ştatının Sinsinat şəhərindəki çıxışında O buyurmuşdur:

"Amerikalılar alicənab millətdir. O, dünyada sülhün bayraqdarıdır və öz nurunu hər yerə saçır. Heç bir millət xeyirxahlıqda və comərdlikdə onunla müqayisə edilə bilməz: digər millətlər ümumi sülh yaratmağa qadir deyillər. Lakin Allaha şükr olsun ki, Amerika bütün ölkələrlə sülh şəraitində yaşayır, buna görə də qardaşlıq və ümumi sülh bayrağını qaldırmağa layiqdir. Amerika ümumi sülh çağırışını elan edəndə, bütün qalan ölkələr deyəcəklər: "Bəli, biz də qəbul edirik!"

"Bütün ölkələrin millətləri birləşəcək və Həzrət Bəhaullahın əlli il bundan əvvəl elan edilmiş Təlimini həyata keçirəcəklər. Həzrət Bəhaullah Öz məktublarında bütün dünya parlamentlərinə təklif edirdi ki, millətlər arasındakı mübahisəli məsələlərin həll edilməsi və ümumi sülhün yaradılması üçün özlərinin ən yaxşı və müdrik adamlarını beynəlxalq dünya parlamentinə göndərsinlər... Onda bütün Peyğəmbərlərin arzuladığı Ümümdünya Parlamenti yaranacaqdır" ("Qərbin ulduzu" jurnalı. c.6, s.81).

Dünyanın heç bir ölkəsində Həzrət Bəhaullahın Təlimi belə iltifatla qarşılanmadığı halda Amerika Birləşmiş Ştatlarında Həzrət Bəhaullahın və Həzrət Əbdülbəhanın çağırışına əhəmiyyətli dərəcədə cavab verdilər. Amerikanın üzərinə qoyulan, bütün millətləri sülhə çağırmaq missiyası, qismən yerinə yetirilsə də, gələcək hadisələrin necə inkişaf edəcəyini bəhailər böyük maraqla gözləyirlər.[4]

BÖYÜK MÜHARİBƏ

Həzrət Bəhaullah və Həzrət Əbdülbəha 1914-1918-ci illər müharibəsinin baş verəcəyi xəbərini dəfələrlə, əvvəlcədən heyrətamiz bir dəqiqliklə söyləmişlər. Həzrət Əbdülbəha 1912-ci il oktyabrın 26-da Kaliforniya ştatının Sakramento şəhərindəki çıxışında demişdir:

"Bu gün Avropa qitəsi silah cəbbəxanasına bənzəyir. Bu birinci qığılcımla partlamağa hazır olan barıt anbarıdır. Xüsusilə indi dünya qarşısında Balkan məsələsi durduğu bir vaxtda təkcə bir qığılçım nəticəsində bütün Avropanı alova bürüyə bilər".

1912-ci ilin oktyabrında Kaliforniyadakı başqa bir çıxışında Həzrət Əbdülbəha söyləmişdir: "İncildə, Allahdan nazil olmuş Vəhy bölməsinin 16-cı fəslində söyləndiyi kimi biz Harmegidon[5] müharibəsi ərəfəsindəyik. Və cəmi iki il qalıb ki, təkcə bir qığılcım bütün Avropanı alovlandırsın.

Peyğəmbərin Kitabında və Daniyal və Yəhyanın xəbərlərində deyildiyi kimi, bütün ölkələrdə baş verən ictimai həyəcanlar, eləcə də minillik imperiyadan əvvəl yaranan və hal-hazırda artıq özünü büruzə verən dini şəkkaklıq bütün Avropanı alovlandıracaqdır.

1917-ci ildə padşahlıqlar devriləcək və ictimai çevrilişlər dünyanı sarsıdacaqdır" (Xanım Korina Trunun "Nordşor Revyu" jurnalına verdiyi məlumat, 26 sentyabr 1914-cü il, Çikaqo.).

Böyük Müharibə ərəfəsində, 1914-cü il avqustun 3-də Həzrət Əbdülbəha demişdir:

"Sivil millətlərin ümumi savaşı yaxınlaşır. Dünya ən fəlakətli qarşıdurma astanasındadır. Nəhəng ordular, milyonlarla adamlar səfərbərliyə alınır və sərhədlərdə yerləşdirilir. Kiçicik toqquşma onları dəhşətli müsibətə salacaq və dünyanı bəşər tarixində hələ heç zaman misli görünməmiş bir yanğın bürüyəcəkdir" ("Qərbin ulduzu" jurnalı, c.5, s.163).

MÜHARİBƏDƏN SONRAKI İCTİMAİ FƏLAKƏTLƏR

Həzrət Bəhaullah və Həzrət Əbdülbəha dünyada hökm sürən inamsızlıq və mövhumatın, cahillik və xurafatın labüd nəticəsi kimi münaqişə və fəlakətlər, böyük ictimai çevrilişlər dövrünün gələcəyini əvvəlcədən xəbər vermişlər. Böyük Dünya Müharibəsi bu çevrilişlərin ancaq bir mərhələsi idi. Həzrət Əbdülbəha 1920-ci ilin yanvarında yazdığı məktubunda buyururdu:

"Siz, ey həqiqəti sevənlər! Siz, ey bəşəriyyətə xidmət edənlər!

Sizin şirin fikirlərinizin və yüksək məramlarınızın xoş rayihəsi Mənə tərəf əsdi və Mən hiss edirəm ki, qəlbim qeyri-ixtiyari olaraq Məni sizə bu məktubu yazmağa təhrik edir.

Ciddi düşünün, görün dünyanı bürüyən hərc-mərclik necə də kədərlidir: yer üzü insan qanına boyanmışdır, üstəlik o qanlı bir kütləyə çevrilib. Müharibə alovu elə dəhşətli yanğın törədib ki, buna bənzərini dünya nə qədim dövrlərdə, nə orta əsrlərdə, nə də yeni dövrdə görmüşdür.

Saysız-hesabsız insan kəllələri, sanki dən kimi müharibə dəyirmanında əzilmiş və üyüdülmüşdür və hətta bu qurbanların qisməti bundan da dəhşətli olmuşdur. Çiçəklənməkdə olan ölkələr xarabazara çevrilmiş, şəhərlər yerlə yeksan edilmiş, abad kəndlər viranə qoyulmuşdur. Atalar oğullarını itirmiş, oğullar atasız qalmış, analar öz oğullarına ağlayaraq acı göz yaşları tökmüş, uşaqlar yetim qalmış, evsiz-eşiksiz qadınlar sərgərdan gəzməyə başlamışlar. Bir sözlə, bəşəriyyət bütün sahələrdə tənəzzülə uğramışdır. Yetimlərin gur naləsi və anaların iztirablı iniltiləri ərşə qalxmışdır.

Bütün bu fəlakətlərin əsas səbəbi irqi, milli, dini və siyasi xurafatlardır və bütün bu xurafatların mənbəyi isə, istər dini, irqi, milli, istərsə də siyasi xarakterli olsun, köhnəlmiş və dərin kök salmış ənənələrdir. Bu ənənələr mövcud olanadək, insan çəmiyyətinin təməli davamsız olacaq, bəşəriyyətin özü isə daim təhlükəyə məruz qalacaqdır.

İndi, bütün yaradılmışların mahiyyəti açıqlanan və bütün məxluqların gizli sirləri aydınlaşan bu gözəl əsrdə, həqiqətin sübh şəfəqlərinin zülmətə bürünmüş dünyanı nura boyadığı zaman, bəşəriyyətə bu qədər zərər vuran belə amansız qırğına yol vermək mümkündürmü? Xeyr, Allaha and olsun bu yolverilməzdir!

İsa Məsih bütün adamları məhəbbətə və əmin-amanlığa çağıraraq Pyotra hökm etdi ki, qılıncı qınına qoysun. Onun İradəsi və Onun Tövsiyəsi məhz belə idi. Lakin Onun adını daşıyanlar öz qılınclarını sıyırdılar. Onların əməlləri ilə Müqəddəs Kitabın mətni arasındakı fərq necə də böyükdür.

60 il bundan əvvəl Həzrət Bəhaullah İran səmasında sanki parlaq günəştək Şəfəq saçaraq bəyan etdi ki, dünya zülmətə bürünmüşdür və bu zülmət ölümcül nəticələr və qanlı müharibələr doğura biləcək hadisələrlə doludur.

Əkka həbsxanasında dustaq olan Həzrət Bəhaullah Almaniya imperatoruna müraciət edərək şübhə doğurmayan aydın ifadələrlə ona bildirir ki, dəhşətli müharibə baş verəcək və Berlində fəryad və zar-zar ağlaşma səsləri ucalacaqdır. Beləcə də, Türkiyə Sultanının fərmanı ilə Əkka qalasında günahsız əsir olan Həzrət Bəhaullah aydın şəkildə və qətiyyətlə ona yazır ki, İstanbulda elə kəskin dərəcədə hərc-mərclik baş verəcəkdir ki, qadınların və uşaqların ah-naləsi ərşə ucalacaqdır. Bir sözlə, O dünyanın bütün hökmdarlarına və böyük dövlət başçılarına məktublar göndərmiş və Onun qabaqcadan dediyi bütün xəbərdarlıqlar yerinə yetmişdir. Müharibələrin qarşısını almaq üçün Onun Şərafətli Qələmindən nazil olan Təlim bütün dünyada geniş vüsət almışdır.

Onun Təliminin birinci müddəası – həqiqətin müstəqil axtarılmasıdır. O bəyan edir ki, kor-koranə təqlid insanın ruhunu öldürdüyü halda, həqiqəti tədqiq etmək dünyanı mövhumat zülmətindən azad edir.

Onun Təliminin ikinci müddəası – bütün bəşəriyyətin birliyidir. Bütün insanlar — vahid sürüdür, Allah isə onları sevən Çobandır. Allah insanlara Özünün böyük mərhəmətini bəxş edir və onların hamısını bir tam hesab edir. "Allahın yaratdığı məxluqlar arasında sən fərq tapa bilməzsən. Hamı Onun quludur və Onun nemətlərinə möhtacdır".

Onun Təliminin üçüncü müddəası — dinin ən güclü qala olmasıdır. O, düşmənçilik və nifrətə deyil, birliyə xidmət etməlidir. Əgər din düşmənçilik və nifrətə səbəb olursa, belə dinin olmaması daha yaxşıdır, çünki din xəstəyə verilən dərman kimidir. Əgər dərman xəstəliyi kəskinləşdirirsə, ondan imtina etmək daha yaxşıdır. Həmçinin dini, irqi, milli və siyasi xurafatlar bəşər cəmiyyətinin əsaslarının dağıdıcısıdır. Onların hamısı bəşəriyyəti qan tökülməsinə və məhvə doğru aparır. Nə vaxta qədər ki, bu xurafatlar mövcuddur, müharibə təhlükəsi kəsilməyəcəkdir. Bütün bunlardan azad olmağın yeganə vasitəsi ümumi sülhdür və bu sülh bütün dövlətlərin və millətlərin nümayəndələrindən ibarət Ali Tribunalın təsis edilməsi sayəsində əldə ediləcəkdir.

Bütün milli və beynəlxalq məsələlərə bu tribunalda baxılmalı və onun hər hansı bir qərarı danışıqsız yerinə yetirilməlidir: əgər hər hansı bir dövlət və ya millət bu tribunalın qərarını inkar edərsə, onda bütün dövlətlər birlikdə ona qarşı çıxmalıdırlar.

Onun Təliminin digər müddəalarından biri də kişi və qadınların hüquq bərabərliyidir və Onun Qələmindən nazil olmuş xeyli başqa prinsiplər vardır. İndi aydın olmuşdur ki, bu prinsiplər insan həyatının və onun əsl ruhunun təcəssümüdür.

Və siz insan cəmiyyətinin xadimləri kimi indi bütün qəlbinizlə və ruhunuzla öz səylərinizi bəşəriyyəti materializm dünyasının zülmətindən və insanların mövhumat düşüncələrindən xilas olunmasına sərf etməlisiniz ki, onlar İlahi Səltənətin nuru ilə işıqlansınlar.

Allaha şükr olsun ki, siz dünyada mövcud olan bütün qaydalarla, qanunlarla və prinsiplərlə tanışsınız: indi Həzrət Bəhaullahın yuxarıda deyilən Təlimindən başqa heç nə bəşəriyyətə əmin-amanlıq və yer üzünə sülh gətirə bilməz. Onlarsız bu zülmət heç zaman yox olmayacaq və bütün bu sağalmaz xəstəliklər müalicə edilməyəcəkdir, əksinə, onlar günü-gündən daha da kəskinləşəcəklər. Balkan dövlətləri sakitləşməyəcəklər və onların vəziyyəti pisləşəcəkdir. Məğlub edilmiş ölkələr razılaşmayacaq və hər hansı bir fürsət düşən kimi müharibə ocağını yenidən yandırmağa çalışacaqlar.

Yeni beynəlxalq hərəkatlar öz ideya və məqsədlərini həyata keçirmək üçün bütün qüvvələrindən istifadə edəcəklər. Solların hərəkatı böyük əhəmiyyət və təsir qüvvəsinə yiyələnəcəkdir. Beləliklə, nurlu qəlblə, səma ruhu ilə, Allahın gücü və Allahın köməyi ilə dünyada Allah nemətlərinin daşıyıcısı olmağa və bütün bəşəriyyətə rifah və əmin-amanlıq gətirməyə çalışın" (Əbdülbəha, 1920-ci ilin yanvarında yazdığı məktubdan)

Həzrət Əbdülbəha 1919-cu ilin noyabr ayındakı söhbətində demişdi:

"Həzrət Bəhaullah dəfələrlə xəbər vermişdi ki, bir vaxt gələcək, dinsizlik dünyanı bürüyəcək və onu hərc-mərcliyə düçar edəcəkdir. Bu hərc-mərcliyin səbəbi isə hələ azadlığa hazır olmayan xalqlara verilən ifrat azadlıq olacaqdır.

Buna görə də xalqların öz mənafeləri naminə bu hərc-mərclikləri və həyəcanları aradan qaldırmaq üçün məcburi tədbirlərin tətbiq edildiyi idarəetmə üsuluna qayıtmaq lazım gələcəkdir.

Aydındır ki, hər bir millət öz müqəddəratını təyin etmək hüququna və fəaliyyət azadlığına tam nail olmağı arzulayır, lakin onlardan bəziləri buna hələ hazır deyildir. Dünyada üstünlük təşkil edən imansızlıq hərc-mərcliyə və qanunsuzluğa səbəb olur. Mən həmişə demişəm ki, Böyük Müharibədən sonra edilən sülh təklifləri günəşin çıxması deyil, ancaq dan yerinin zəif işartısıdır".

İLAHİ SƏLTƏNƏTİN BAŞLANMASI

Zamanın bütün bu narahatlıqlarına baxmayaraq, Allahın İşi uğurlar qazanacaqdır. Ayrı-ayrı şəxslərin xudpəsəndliklə yaşamaq uqrunda apardıqları mübarizə və ya partiya mənafeləri, təriqətçilik və ya milli məqsədlərin güdülməsi ucbatından doğan fəlakətlər adamları Allah Kəlamının buyurduğu vasitələrə müraciət etmək məcburiyyətində qoyacaqdır. Bədbəxtliklər nə qədər çox olarsa, adamlar da bir o qədər çox yeganə, düzgün vasitəyə müraciət edəcəklər. Həzrət Bəhaullah Nasirəddin şaha ünvanladığı məktubunda yazır:

"Allah bədbəxtliyi bu yaşıl otlağa səhər yağışı, Onun göyü və yeri işıqlandıran Çırağı üçün fitil kimi müəyyən etmişdir... Bədbəxtliklər vasitəsilə Onun İşi ucalır və Onun Şərəfi şəfəq saçır. Onun bütün keçmiş zamanlarda və indiki dövrdə mövcud olan Qanunu belədir".

Həzrət Bəhaullah və Həzrət Əbdülbəha ən aydın ifadələrlə qabaqcadan xəbər vermişlər ki, tezliklə bütün maddi varlıqlar üzərində qələbə qazanılacaq və bunun ardınca Ən Böyük Sülh qurulacaqdır. Həzrət Əbdülbəha 1904-cü ildə yazırdı:

"Bil ki, məhrumiyyətlər və bədbəxtliklər günü-gündən artacaq və adamlar əzab çəkəcəklər. Hər yerdə sevinc və xoşbəxtlik qapıları bağlanacaqdır. Dəhşətli müharibələr başlanacaqdır. Bütün arzuların puç olması və ümidsizlik adamları elə bürüyəcəkdir ki, onlar Allaha müraciət etməyə məcbur olacağlar. Bu zaman böyük xoşbəxtlik nuru bütün üfüqləri işıqlandıracaq və hər yerdən "Ya Bəha-ül-Əbha"[6] sədaları ucalacaqdır" ("Müharibə və sülh" haqqında məcmuədə verilmiş Əbdülbəhanın L.D.B.-ya yazdığı məktubdan, s.187)

1914-cü ilin fevralında Ondan "bu Təlimi hər hansı bir böyük dövlət tanıyırmı?" — deyə soruşulanda, Həzrət Əbdülbəha belə cavab vermişdi: "Dünyanın bütün millətləri dini qəbul edəcəklər. Əgər siz bu Təlimin yarandığı ilkin vaxtdakı vəziyyətini indiki dövrdəki vəziyyəti ilə müqayisə etsəniz, onda görərsiniz ki, Allah Kəlamı necə tez təsiretmə gücünə malikdir və indi Allahın İşi bütün dünyanı necə bürümüşdür. Şübhəsiz, hamı Allah İşinin kölgəsinə toplaşacaq" ("Qərbin ulduzu" jurnalı, c.9, s.31).

Həzrət Əbdülbəha bildirir ki, bəşəriyyətin birliyi bu əsr ərzində baş verəcəkdir. Məktublarının birində O yazır:

"Bəşər ailəsinin bütün üzvləri, istər millətlər olsun və ya hökumətlər, şəhərlər və ya kəndlər olsun, onlar getdikcə daha çox bir-biri ilə qarşılıqlı surətdə bağlanırlar. Ona görə ki, heç kim müstəqil və sərbəst qala bilməz və xüsusilə də ona görə ki, siyasi münasibətlər bütün xalqları və millətləri birləşdirməyə başlamışdır, ticarət, sənaye, kənd təsərrüfatı və mədəniyyət əlaqələri isə gündən-günə möhkəmlənməyə başlamışlar. Deməli, bütün bəşəriyyətin birliyinin həyata keçirilməsi indi mümkün olmuşdur. Doğrudan da bu, ecazkar döv-rün, bu şərəfli əsrin möcüzələrindən biridir. Ona görə ki, nur əsri olan bu əsrə yeganə və müqayisə edilməz qüdrət, dəbdəbə və şöhrət bəxş edilmişdir. Deməli, hər gün təəccüb doğuracaq dərəcədə yeni-yeni möcüzələr baş verir və nəhayət, biz bəşər cəmiyyətini öz şəfəqləri ilə işıqlandıran həqiqət Çırağını görəcəyik".

Daniyal Peyğəmbərin Kitabının son iki ayəsində belə müəmmalı sözlərə rast gəlirik: "Gözləyən və min üç yüz otuz beş günə çatan kəs bəxtiyardır. Sənsə öz sonuna doğru get və sakitləşərsən və günlərin sonunda sənin qismətinə düşəni almaq üçün qalxarsan" (Библия. Книга Пророка Даниила, 12:12-13).

Bir çox alimlər bu sözlərin mənasını açmağa cəhd göstərmişlər. Bu sətirlərin müəllifinin də iştirak etdiyi süfrə arxasındakı söhbətlərin birində Həzrət Əbdülbəha Daniyal Peyğəmbərin qabaqcadan söylədiyi xəbərlərin İslam erasının başlanması tarixindən yerinə yetdiyini bildirdi.

Həzrət Əbdülbəhanın məktublarından aydın olur ki, Peyğəmbərcəsinə söylənmiş bu xəbər Həzrət Bəhaullahın Öz Missiyasını Bağdadda bəyan etməsinin yüz illiyinə, yəni 1863-cü ilə aiddir. "İndi Daniyal Peyğəmbərin: "Gözləyən və min üç yüz otuz beş günə çatan kəs bəxtiyardır" ayələrinin sən soruşduğun şərhinə gəldikdə isə bu günlər qəməri tarixi ilə deyil, günəş ili ilə hesablanmalıdır. Ona görə ki, bu hesablamalara görə həqiqət Günəşinin Doğacağı gündən bir əsr keçəcək və bu zaman İlahi Nur Şərqdən Qərbədək dünyanı şəfəqlərə boyayacaqdır. Onda, həmin gün möminlər sevinəcəklər".

ƏKKA VƏ HAYFA

1914-cü il fevralın 14-də Hayfada bəhai zəvvarlar üçün tikilmiş evlərin birinin pəncərəsi qarşısında oturan zaman Həzrət Əbdülbəhanın Əkka və Hayfa şəhərləri haqqında söylədiklərini Həzrət Əbdülbəhanın katibi Mirzə Əhməd Söhrab öz gündəliyində belə qeydə almışdır.

"Zəvvarlar evindən açılan mənzərə olduqca gözəldir, xüsusilə ona görə ki, o Həzrət Bəhaullahın məzarı qarşısında tikilmişdir. Gələcəkdə Əkka və Hayfa arasındakı ərazidə binalar tikiləcək və bu iki şəhər birləşərək böyük bir şəhərin iki rayonuna çevriləcəkdir. İndi bu ərazilərə baxanda, Mən aydın görürəm ki, bura dünyanın birinci dərəcəli ticarət mərkəzlərindən biri olacaqdır.

Bu böyük yarımdairəvi görfəz ən gözəl limana çevriləcək və dünyanın bütün ölkələrinin gəmiləri özlərinə burada dayanacaq və mühafizə tapacağlar. Böyük gəmilərin hər biri yer kürəsinin hər tərəfindən minlərlə kişi və qadını öz göyərtəsində bu limana gətirəcək. Dağlarda və düzənliklərdə ən dəbdəbəli gözəl binalar və saraylar tikiləcək, sənaye müəssisələri və ictimai idarələr açılacaqdır.

Burada bütün xalqların mədəniyyətinin və sivilizasiyasının ən yaxşı nümunələri, onların rayihəsi birləşəcək və insanları qardaşlığa aparan yolu işıqlandıracaqdır. Hər tərəfdə ecazkar bağçalar, meyvə bağları, meşəliklər və parklar salınacaqdır. Gecələr bu nəhəng şəhər elektirik işığına qərq olacaqdır. Əkkadan başlamış Hayfayadək uzanan bütün liman başdanbaşa işıqlandırılmış yolu xatırladacaq. Gəmilərə yol göstərmək üçün Kərmel dağının hər iki tərəfində ən güclü projektorlar qurulacaqdır.

Kərmel dağının özü zirvəsindən tutmuş ətəyinədək işıq dənizinə qərq olacaqdır. Kərmel dağının zirvəsində olan adam, eləcə də gəmilərdəki sərnişinlər dağa yaxınlaşdıqca dünyanın ən gözəl və əzəmətli mənzərəsini görəcəklər. Dağın hər tərəfindən "Ya Bəha-ul-Əbha" simfoniyası eşidiləcək və sübh çağından qabaq məlahətli səslərlə müşayiət edilən valehedici musiqi Qüdrətlinin Taxtına ucalacaqdır.

Həqiqətən, Allahın yolu sirli və anlaşılmazdır. Şiraz və Tehran, Bağdad və İstanbul, Ədirnə və Əkka və Hayfa arasında nə kimi zahiri əlaqə var?[7] Allah-taala səbrlə, addım-addım, Özünün qabaqcadan müəyyənləşdirmiş planına uyğun olaraq elə fəaliyyət göstərir ki, Peyğəmbərlərin əvvəlcədən söylədikləri, ölçüb-biçdikləri xəbərlər yerinə yetsin. Xilaskarın minilliyi barəsində vəd bütün Tövratdan qızıl xətlə keçir və belə müəyyən edilmişdi ki, Allah Özünə münasib bildiyi vaxtda onların yerinə yetməsinə rəvac verəcəkdir. Hətta bircə söz belə şərh edilməmiş və icra edilməmiş qalmayacaqdır" (Mirzə Əhməd Söhrabın gündəliyindən).