Bəhai dinində özündən əvvəlki islam dininə oxşar olaraq namaz və oruc vardır və vacib və mühüm ibadət formaları kimi namaz və oruc xüsusi əhəmiyyətə malikdir. Bu iki ibadət forması “dinin iki sütunu”, namazın din səmasının “ayı”,  orucun isə onun “günəşi” adlandırılaraq icrası möminlər üçün vacib buyrulmuşdur. Lakin namaz və orucun mahiyyəti eyni olsa da, bəzi məqamları ilə bəhai dinində bu ibadət formaları fərqlənir. Bu hər şeydən əvvəl bəhai dinində üç cür namaz olması və orucluğun isə bəhai (Badi) təqviminə uyğun olaraq bir bəhai ayı müddətində, yəni 19 gün davam etməsi və bu vaxtın yerini heç vaxt dəyişməməsidir. Namaz üçün digər xarakter cəhət onun təklikdə icra olunması və camaat (toplum) namazının olmamasıdır.

Deyildiyi kimi, bəhai dinində üç cür namaz mövcuddur, və mömin bu üç namazdan birini seçir və onu qılır. Bu namazlar "Qısa namaz", "Orta namaz" və "Böyük namaz" adlanır. Onların sözləri və qılma qaydası ilə saytımızda yerləşdirilmiş "Bəhai duaları" kitabından tanış ola bilərsiniz. Qeyd edək ki, bəhai namazı başqa bəhai duaları kimi istənilən hər bir dildə oxuna bilər. Əgər mömin qısa namazı seçmişsə, o bu namazı gündə bir dəfə günortadan gün batana kimi qılmalıdır. Əgər o, orta namazı seçmişsə, o bu namazı gündə üç dəfə qılmalıdır. Bunlardan birincisini səhər, yəni gün çıxandan günortaya kimi müddətdə, ikincisini gunortadan gün batana kimi, və üçüncüsünü gün batandan sonra iki saat ərzində qılmalıdır. Əgər mömin böyuk namazı seçmişsə, o bu namazı iyirmi dörd saat müddətində bir dəfə istədiyi vaxt qıla bilər. Namazdan qabaq dəstəmaz alınmalıdır, yəni namaz niyyəti ilə əl və üz yuyulmalıdır. Əgər dəstəmaz orta namaz üçün alınırsa, dəstəmaz vaxtı xüsusi sözlər söylənməlidir. Əgər dəstəmaz o biri namazlar üçün alınırsa, xüsusi sözləri demək vacib deyildir. Namaz gılarkən mömin üzünü qibləyə tərəf tutmalıdır. Bəhai qibləsi Əkka şəhərində yerləşir (coğrafi koordinatları: 32°55' ş.e.d., 35°05' ş.u.d.). Əkkanın məqamı barədə Hz. Məhəmməd Peyğəmbərin (s.ə.) buyurduqları ilə burada tanış ola bilərsiniz.

“Şəhadət verirəm, Ey mənim Allahım, Sən məni Səni tanımaq və Sənə ibadət etmək üçün yaratmısan.” Bəhai dinindəki üç namazdan biri olan kiçik namazın ilk ayəsi budur. Və ibadətin çox mühüm forması olan namaz bəndənin öz Rəbbi ilə gündəlik ünsiyyətini saxlayan, bəndənin öz Rəbbi ilə məhəbbət dili ilə danışmasını təmin edən bir vasitə olması Bəhai dinində namazların icrasında aydın görünür. “İnsan həyatının iki qanadı” olmaqla namaz və oruc Bəha Dinində də möminin və eləcə də icmanın ibadət həyatının zənginləşməsi üçün ən mühüm faktorlardandır.     

Bəhai orucu Badi təqvimi ilə Əla ayı ərzində (Miladi təqvimi ilə mart ayının 2-dən 20-dək) 19 gün müddətində tutulur. İslam orucunda olduğu kimi, bəhai orucunda da səhər gün çıxandan axşam gün batana qədər yemək və içmək tam qadağandır. Əlbəttə ki, orucluq təkcə yemək-içməkdən çəkinməkdən ibarət deyil, bu ruhani addımdır, ibadətdir. Orucluq ayı Badi təqvimində son aydır, və orucluq yeni ili başlayan Novruz bayramı ilə (21 mart) tamamlanır. Nəzərə almaq lazımdır ki, bəzi hallarda astronomic səbəblərdən Novruz bayramı mart ayının 20-nə düşür. Belə illərdə Novruzdan qabaq olan orucluq ayı da onunla birlikdə bir gün sürüşür.

Bəhai Dinində Namaz və Oruca baxış, onların vacibliyi və əhəmiyyəti barədə Müqəddəs Yazılardan çıxarışlarla tanış olmaq üçün saytımızda yerləşdirilmiş “Namaz və Orucun vacibliyi” məcmuəsini oxuya bilərsiniz.

Qeyd: Azərbaycanda yaşayanlar üçün oruca aid zaman cədvəllərı burada yerləşdirilmişdir.